عارفانہ کلام حمد نعت منقبت
گو دائرۂ مہر شرر بار ہے وسیع
سرکارؐ کی ردا کا ہر اک تار ہے وسیع
کوئے نبیِ کی خاک کے ذروں کا ہے طفیل
جو آسماں کا شعبۂ انوار ہے وسیع
ان کے کرم سے صبح مسرت بھی آئے گی
کچھ غم نہیں جو غم کی شب تار ہے وسیع
لفظوں کے دائرے میں سمٹنا محال ہے
مضمون نعت احمد مختارﷺ ہے وسیع
اہل زمین و اہل فلک سب رہیں فضل
ان کے کرم کا دائرۂ کار ہے وسیع
جتنی وسیع خلقت پروردگارﷻ ہے
اتنی فضائے رحمت سرکارؐ ہے وسیع
اس سے وسیع تر ہے فضائے ثناء کفیل
مانا کہ تیرا شہپر افکار ہے وسیع
کفیل احمد فتحپوری
No comments:
Post a Comment