راحت دل متاع جاں ہے تو

راحتِ دل، متاعِ جاں ہے تُو

اے غمِ دوست جاوداں ہے تُو

آنسوؤں پر بھی تیرا سایہ ہے

دھوپ کے سر پہ سائباں ہے تُو

دِل تیری دسترس میں کیوں نہ رہے

اِس زمیں پر تو آسماں ہے تُو

شامِ شہرِ اُداس کے والی

اے میرے مہرباں کہاں ہے تُو

سایۂ ابرِ رائیگاں ہوں میں

موجۂ بحرِ بیکراں ہے تُو

میں تہی دست و گرد پیراہن

لعل و لماس کی دُکاں ہے تُو

لمحہ بھر مِل کے رُوٹھنے والے

زندگی بھر کی داستاں ہے تُو

کُفر و ایماں کے فاصلوں کی قسم

اے متاعِ یقیں، گُماں ہے تُو

تیرا اقرار ہے نفی میری

میرے اثبات کا جہاں ہے تُو

اے میرے لفظ لفظ کا مفہوم

نُطقِ بے حرف و بے زباں ہے تُو

جو مقدر سنوار دیتے ہیں

اُن ستاروں کی کہکشاں ہے تُو

بے نشاں بے نشاں خیام مرے

کاروں کارواں رواں ہے تُو

اے گریباں نہ ہو سُپردِ ہوا

دِل کی کشتی کا بادباں ہے تُو

جلتے رہنا چراغِ آخرِ شب

اپنے محسنؔ کا رازداں ہے تُو

محسن نقوی