مجھ سے ساقی نے کہی رات کو کیا بات اے جوش
یعنی اضداد ہیں پروردۂ یک ذات اے جوش
مست و بے گانہ گزر جا کرۂ خاکی سے
یہ تو ہے رہگزرِ سیلِ خیالات اے جوش
اور تو اور، خود انسان بہا جاتا ہے
کتنا پر ہول ہے طوفانِ روایات اے جوش
لوگ کہتے ہیں حجابات نہیں جز آیات
کس سے کہئے کہ یہ آیات ہیں خود ذات اے جوش
اہلِ الفاظ شریعت پہ مٹے جاتے ہیں
کس کو سمجھاؤں مشیت کے اشارات اے جوش
دیکھیے صبحِ جنوں ذہن میں کب طالع ہو
عقل سنتا ہوں کہ ہے اک ابدی رات اے جوش
قوتِ کل کے مصالح سے اور اتنے بدظن
وائے بر دغدغۂ اہلِ مناجات اے جوش
ساغرِ مے ہی میں ہوتا ہے طلوع اور غروب
آفریں بر دلِ رندانِ خرابات اے جوش
کون مانے گا کہ ہیں عین مشیت واللہ
زندگانی کے یہ بگڑے ہوئے عادات اے جوش
تجھ کو کیا فقر میں راحت ہے کہ شاہی میں فراغ
تُو تو ہے خلوتئ پیرِ خرابات اے جوش
جوش ملیح آبادی
No comments:
Post a Comment