سو کا نوٹ؛ یہ جناب قائد اعظم کی اک توہین ہے

 سو کا نوٹ

دیکھوں، دیکھوں، کیا عجوبہ ہے، ذرا دینا ادھر

قائد اعظم کی ہے تصویر سو کے نوٹ پر

ذہن بھٹکا ہے یہ کس کا، یہ ستم کس نے کیا

میری خوش طبعی میں شامل زہرِ غم کس نے کیا

مصلحت، کہہ کر زبانِ حال سی دی جائے گی

کیا اسی تصویر سے رشوت بھی لی، دی جائے گی

دل لرز اٹھے، نہ کیوں اس خواب کی تعبیر سے

رات دن ہو گی سمگلنگ بھی اسی تصویر سے

کیا مسلماں اس طرح بھی لائیں گے مجھ پر عذاب

کیا اسی تصویر سے جا کر خریدیں گے شراب

لوگ کیا کھیلیں گے میری روح کی تنویر سے

ملک بھر میں کیا جوا ہو گا اسی تصویر سے

کلمہ گو کیا یوں بھی لوٹیں گے مرا صبر و قرار

کیا اسی تصویر سے چکلوں میں ہو گا کاروبار

نوٹ پر تصویر دانش انحرافِ دین ہے

یہ جنابِ قائد اعظم کی اک توہین ہے

احسان دانش​

احسان دانش مرحوم نے 1969 میں سو روپے کے کرنسی نوٹ پر بابائے قوم قائد اعظم کی تصویر چھاپے جانے پر اپنے تنقیدی جذبات کا اظہار ان اشعار میں کیا تھا جو ایک سچے کھرے پاکستانی کے جذبات کی ترجمانی کرتے ہیں۔