سلامت رونقیں یارب در بزم بہاراں پر

 سلامت رونقیں یا رب، درِ بزمِ بہاراں پر

'ابھی باقی ہے کچھ کچھ دھوپ،دیوارِگلستاں پر'

سنا ہے تِتلیاں تجھ سے ہی سارے رنگ لیتی ہیں

سنا جگنو ٹھہرتے ہیں تِری ہی نوکِ مژگاں پر

تِری نمناک آنکھوں پر لٹا دوں راحتیں ساری

سبھی شامیں کروں قرباں تِری زلفِ پریشاں پر

ہر اک لمحہ ازل سے محوِ تشریحِ مسلسل ہے

محبت سے مجمل دلنشیں لفظِ درخشاں پر

ابھی کچھ دیر ہے ہمدم تِرے خوابوں کے کِھلنے میں

ابھی کچھ قرض ہیں باقی ہماری چشمِ حیراں پر

وہ مجھ سے مانگنے آیا تھا اذنِ ترکِ یارانہ

ستم کیا ڈھا گیا دیکھو دلِ بسمل فقیراں پر

زہرا علوی