دشمن خلاف جان سے پیارے مِرے خلاف
کیوں ہو گئے ہیں سارے کے سارے مرے خلاف
اس چال باز شخص نے میدانِ جنگ میں
میرے ہی یار دوست اتارے مرے خلاف
پہلے ہمارے پیار کے دنیا خلاف تھی
اب ہو گیا خدا بھی تمہارے مرے خلاف
بعد از خدا تمہیں پہ مکمل یقین تھا
تم نے بھی کی ہیں سازشیں پیارے مرے خلاف
وہ جن کو بولنے کا طریقہ سکھایا تھا
وہ بھی لگاتے رہتے ہیں نعرے مرے خلاف
مجھ کو بھنور سے کوئی شکایت نہیں نوید
در اصل ہو گئے تھے کنارے مرے خلاف
نوید عباس
No comments:
Post a Comment