رات کروٹ بدل رہی ہے دیکھ
تیری زلفوں میں ڈھل رہی ہے دیکھ
اور اک ساغرِ خمار آگیں
زندگانی سنبھل رہی ہے دیکھ
یہ صراحئ بادۂ ہی اکثر
تیرا نعم البدل رہی ہے دیکھ
حسنِ گل میں کمی نہیں لیکن
زندگی خوں اُگل رہی ہے دیکھ
رنگ لائے گی کیا یہ روحِ عصر
کشت و خوں میں جو پل رہی ہے دیکھ
جامۂ کوہکن میں روحِ جبر
اک نئی چال چل رہی ہے دیکھ
ظلمتِ زیست سے الجھتا رہ
شمعِ تقدیر جل رہی ہے دیکھ
اک سحر کی تلاش پیہم میں
زندگی آنکھ مل رہی ہے دیکھ
پرچمِ عزم کو بلند کر اور
وہ مشیت سی ٹل رہی ہے دیکھ
شیخ ایاز
No comments:
Post a Comment