مرا ہونا ہے تو سن لو کہاں ہونا پڑے گا

 مِرا ہونا ہے تو سن لو کہاں ہونا پڑے گا

جہاں ہوں جانِ جاں تم کو وہاں ہونا پڑے گا

نہیں درکار اک کردار وقتی طور پر جی

ہمارے ساتھ مل کر داستاں ہونا پڑے گے

محبت ہے تو پھر خوفِ جدائی بھی رہے گا

سو دل کو لمحہ لمحہ بدگماں ہونا پڑے گا

نہ جانے دیکھ کر تم کو ہوا احساس کیوں یہ

کہ مانندِ زلیخا پھر جواں ہونا پڑے گا

تمہی کو جھیلنی ہیں جسم و جاں کی وحشتیں سب

مکمل دوست پورا رازداں ہونا پڑے گا

تِری تعمیر ہے مضمر مِری تعمیر میں یوں

ہوئی جو رائیگاں تو رائیگاں ہونا پڑے گا

یہ عہدِ تلخ شیرینی سا بھائے فاخرہ کو

کچھ ایسے طور اس پر مہرباں ہونا پڑے گا

فاخرہ انجم