یوں بھی کچھ وقت گزارا کسی رسوائی میں گم

 یوں بھی کچھ وقت گزارا کسی رُسوائی میں گُم

اچھی کٹ جائے گی پھر یاد کی شہنائی میں گم

تیرے ہنسنے سے اُبھر آیا ہوں ویسے کہیں تھا

پورے منظر سے الگ بات کی گہرائی میں گم

ہم ہیں اس عہدِ جواں مرگ میں بوڑھے کاذب

ہم نے رہنا ہے نئی بات کی پسپائی میں گم

ایک انبوہِ عجب رنگ ہے مجھ میں محصور

ہر بصارت سے الگ تیری پذیرائی میں گم

یہ اندھیرا ہے کسی ماہِ درخشاں کا بھرم

میں ہوں بیدار مگر رات کی دانائی میں گم

مجھے مل جائے تو ماتھے پہ کروں پیار اسے

ہائے وہ شخص ہوا ہے میرے ہرجائی میں گم

یہ وبا اتنی بھی مہلک نہ بنا ڈر ہے مجھے

کوئی باقی نہ بچے منظر و بینائی میں گم

ذوالقرنین حسنی