راحت جاں تھا وہی اب دشمن جاں ہو گیا

راحتِ جاں تھا وہی اب دُشمنِ جاں ہو گیا

ظرف مرہم اپنی قسمت سے نمکداں ہو گیا

زندگی پر بس نہیں ہے موت پر قابو نہیں

بس انہیں مجبوریوں کا نام انساں ہو گیا

خُون کی چھینٹوں سے وحشی نے کِھلائے اتنے گُل

اک چمن چھوٹا سا بر دیوارِ زِنداں ہو گیا

خون کا دعویٰ تو کیسا اور الٹا حشر میں

کٹ گیا میں جب مِرا قاتل پشیماں ہو گیا

ہٹیے ہٹیے نغمۂ ہستی سے لو اُٹھنے لگی

بچیے بچیے میرے جل بُجھنے کا ساماں ہو گیا

ضبط کی دُنیا ڈبو دی ایک آنسو نے مِرے

بُوند بھر پانی بڑھا اتنا کہ طوفاں ہو گیا

اشکِ خُونی نے مِرے نشتر وہ کیں گُلکاریاں

میرا دامن ایک چھوٹا سا گُلستاں ہو گیا

نشتر قائم گنجوی

محمد حنیف خاں نشتر