مِری حیات کی لکھی گئی کتاب عجیب
متن غریب ہے اس کا تو انتساب عجیب
کسی کے ہجر نے کانٹے خیال میں بوئے
حصارِ خار میں مہکے مگر گلاب عجیب
ازل کے حبس کدوں میں چلی ہوا تازہ
نگاہِ ناز نے وا کر دئیے ہیں باب عجیب
قدم تو کوچۂ جاناں کو اٹھ گئے از خود
انا کی جان پہ ٹوٹے مگر عذاب عجیب
وفورِ شوق میں آنکھیں سوال ہوتی ہیں
لبوں پہ کانپتے رہتے ہیں اضطراب عجیب
فرازِ طور پہ لفظوں کو افتخار ملا
سوالِ شوخ سے بڑھ کر ملا جواب عجیب
گئے برس بھی یہاں آشتی کا قحط رہا
اور اب کے سال اٹھے خوف کے سحاب عجیب
رگِ حیات کہاں لامکاں کی بات کہاں
جنابِ شیخ نے پیدا کئے حجاب عجیب
یعقوب آسی
No comments:
Post a Comment