میں جس جگہ ہوں وہاں بود و باش کس کی ہے

 میں جس جگہ ہوں وہاں بود و باش کس کی ہے

مِرے بدن کے کفن میں یہ لاش کس کی ہے

تجھے خیال میں لا کر گل و نجوم کے ساتھ

یہ دیکھنا ہے کہ اچھی تراش کس کی ہے

خیال و خواب کی گلیوں میں بھی ہے ویرانی

مِری اداس نظر کو تلاش کس کی ہے

تمہارا کام نہیں تو پھر انتظام ہے کیا

دل و جگر پہ یہ ایک اک خراش کس کی ہے

جو آپ اپنی ہی پسماندگی پہ ناز کرے

میں خود نہیں تو یہ طرزِ معاش کس کی ہے

فاضل جمیلی