حوصلہ کس کا بنے جو مدح خوان بوتراب

 عارفانہ کلام حمد نعت منقبت سلام

حوصلہ کس کا بنے جو مدح خوانِ بُوتُراب

ہے زبانِ مصطفیٰؐ پر وصفِ شانِ بو تراب

بات کعبہ میں ولادت سے سمجھ میں آ گئی

یہ بتانا تھا کہ کعبہ ہے مکانِ بوتراب

لحمک لحمی ہو یا من کنت مولیٰ کی حدیث

کر رہی ہیں صاف یہ اعلانِ شانِ بوتراب

سر جھکانے سے یہاں کُھلتا ہے بابِ معرفت

سجدہ گاہِ عارفاں ہے آستانِ بوتراب

رہنمایانِ شریعت، رہبرانِ معرفت

سچ اگر پوچھو یہ سب ہیں وارثانِ بوتراب

دورِ ماضی ہو کہ مستقبل کہ دورِ حال ہو

ہر زمانے میں رہے گی داستانِ بوتراب

گلشنِ بغداد ہو یا، گلشنِ اجمیر ہو

ہر چمن میں ہیں عنادل نغمہ خوانِ بوتراب

ہمنشیں نھج البلاغہ کی فصاحت کیا کہوں

لطف دیتی ہے عجب طرزِ بیانِ بوتراب

در پہ آئے مانگنے ذکر آگیا قرآن میں

زندگی پائی دوامی پا کے نانِ بوتراب

صاحبانِ دل کا کہنا ہے مِرا کہنا نہیں

کوئی نظروں میں نہیں آتا بشانِ بوتراب

کوہ پیما مشکلیں اُڑ جائیں تنکوں کی طرح

ہل ہی جانا ہے لبِ معجز بیانِ بوتراب

یہ ملا محمود! حق سے ثمرۂ حُبِ علی

ہو گئے مطلوبِ حق سب طالبانِ بوتراب

سید ابوالفضل محمود قادری