محبت ایک راز ہے

محبت

محبت ایک راز ہے

وہ راز روح میں رہے جو حسن بن کے جلوہ گر

نگاہ جس کی دید کی نہ تاب لائے عمر بھر

شعور سے بلند تر

محبت ایک راز ہے

محبت ایک ناز ہے

وہ ناز جو حیات کو نشاط جاوداں کرے

زمیں کے رہنے والوں کو جو عرش آشیاں کرے

یہ فرقِ ایں وآں کرے

محبت ایک ناز ہے

محبت ایک خواب ہے

وہ خواب جس کی سر خوشی پہ جنتیں نثار ہوں

فسانہ ساز زندگی کی عشرتیں نثار ہوں

حقیقتیں نثار ہوں

محبت ایک خواب ہے

محبت اک گُناہ ہے

لٹے نہ کاروانِ بو، رہے جو غنچہ میں نہاں

صدف سے باہر آکے پھر گہر کی آبرو کہاں

ہوئی جو محرمِ زُباں

محبت اک گُناہ ہے

محبت اک نگار ہے

تما صدق و سادگی، تمام حسن و کافری

تمام شورش و خلش، مگر بطرزِ دلبری

شکست جس کی برتری

محبت اک نگار ہے

ادا جعفری