دل میں جو بات کھٹکتی ہے دہن تک پہنچے
خامشی مرحلۂ عرضِ سخن تک پہنچے
محرمِ حسنِ بہاراں تو نہیں ہو سکتی
وہ نظر صرف جو گلہائے چمن تک پہنچے
زندگی نام اسی موجِ مئے ناب کا ہے
میکدے سے جو اٹھے دار و رسن تک پہنچے
گلستانوں کا اجارہ نہیں فصلِ گل پر
فصلِ گل وہ ہے جو ہر دشت و دمن تک پہنچے
عہد ہم نے بھی کیا تھا نہ ملیں گے اس سے
بارہا ہم بھی اسی عہدِ شکن تک پہنچے
بات کرتا ہے بظاہر بڑی سادہ سی کمال
جو سخنور ہیں وہی اس کے سخن تک پہنچے
کمال احمد صدیقی
No comments:
Post a Comment