میں مرد ہو کے بھی رو رہا ہوں

 بھول بُھلیاں

عجیب ہے تجھ سے میرا رشتہ

عجیب تر ہے مِری محبت

تصوراتی سفر رواں ہے

میں کتنے سالوں سے آگے بڑھتا ہی جارہا ہوں

مگر ابھی تک

انہیں لکیروں میں چہل قدمی ہی ہورہی ہے

بس ایک احساس کی لہر ہے

کہ جس میں، میں بہتا جارہا ہوں

تِری محبت بھی دن بدن تو

شدید ہوتی ہی جارہی ہے

تصوراتی سفر رواں ہے

میں جب بھی آئینہ دیکھتا ہوں

بہت ہی کمزور ایک لڑکا

کہ جس کی پلکوں پہ بس نمی ہے

اور اس کے چہرے پہ آنسوؤں نے

نہ جانے کتنی لکیریں کھینچیں

جو چاہتوں کی پرانی راہوں میں

ایک ملبا نما کھڑا ہے

جو مجھ سے چھوٹا ہے

میرے جیسا ہے

میں نہیں ہوں

تو میری آنکھوں میں اس کی خاطر

رحم کے جذبے ہی پھوٹتے ہیں

اور آئینہ کہہ رہا ہو جیسے

بس ایک لڑکی کے دُور جاتے ہی دیکھیۓ تو

میں مرد ہو کے بھی رو رہا ہوں

خالد ہما