زخم میرے کریدنے والو

 زخم میرے کریدنے والو

خون رِستا ہے درد ہوتا ہے

آہ بھرنے سے داغ جلتے ہیں

ضبط کرنے سے سانس رکتی ہے

لفظ نازک سا اک سہارا ہیں

ہجر کو نظم میں پرونے کا

آنسوؤں کو زبان دینے کا

یہ جو مصرعوں پہ داد دیتے ہو

خونِ دل میں ڈبو کے لکھے ہیں

ان سے لپٹے ہیں رتجگوں کے بھنور

ان میں محرومیاں پِروئی ہیں

تم کو یہ سب دکھائی دیتا ہے

سسکیاں بھی سنائی دیتی ہیں

ان محبت میں چُور نظموں سے 

نارسائی کی باس آتی ہے

داد دیتے ہو، سر کو دُھنتے ہو

اور پھر پوچھتے بھی ہو مجھ سے

کیا کہانی تھی کیا فسانہ تھا

نام کیا تھا، کہاں ملے تھے اسے

کس طرح، کب جدا ہوئے اس سے

یاد کرتے ہیں کیا اسے اب بھی

بھول جانے کا کیا طریقہ ہے

زخم میرے کُریدنے والو

خون رِستا ہے، درد ہوتا ہے

عاطف سعید