موت کے چہرے پہ ہے کیوں مردنی چھائی ہوئی

موت کے چہرے پہ ہے کیوں مُردنی چھائی ہوئی 

دیکھنا کون آ گیا؟ کیوں ٹل گئی آئی ہوئی 

کوئی بدلی تو نہیں ابھری افق پر دیکھنا؟

پھر فضائے توبہ پر ہے بے دلی چھائی ہوئی 

سیکھ دنیا ہی میں زاہد حور سے ملنے کے ڈھنگ 

ورنہ روئے گا کہ جنت میں بھی رسوائی ہوئی 

خانۂ دل میں کسی پردہ نشیں کی آرزو 

آرزو کیا ہے دلہن بیٹھی ہے شرمائی ہوئی 

عشق ہے اپنی وفاؤں سے بھی شرمایا ہوا 

عقل ہے اپنی خطاؤں پر بھی اترائی ہوئی 

کاش اس مصرع کا تم کو پاس ہوتا اے حفیظ

یہ بہار آئی ہوئی، ایسی گھٹا چھائی ہوئی 

حفیظ جالندھری

آج 14 جنوری 2020 حفیظ جالندھری کا 120 واں یوم پیدائش ہے