خدا کا ذکر کرے ذکر مصطفیٰ نہ کرے

عارفانہ کلام نعتیہ کلام

خدا کا ذکر کرے، ذکر مصطفیٰﷺ نہ کرے

ہمارے منہ میں ہو ایسی زباں خدا نہ کرے

در رسولﷺ پہ ایسا کبھی نہیں دیکھا

کوئی سوال کرے اور وہ عطا نہ کرے

کہا خدا نے، شفاعت کی بات محشر میں

پہل حبیب کرے، کوئی دوسرا نہ کرے

مدینے جا کے نکلنا نہ شہر سے باہر

خدانخواستہ یہ زندگی وفا نہ کرے

اسیر جس کو بنا کر رکھیں مدینے میں

تمام عمر رہائی کی وہ دعا نہ کرے

نبی کے قد موں پہ جس دم غلام کا سر ہو

قضا سے کہہ دو کہ اک لمحہ بھی قضا نہ کرے

شعور نعت بھی ہو، اور زباں بھی ہو ادیب

وہ آدمی نہیں جو ان کا حق ادا نہ کرے

ادیب رائے پوری