لائی بہار شوق کے ساماں نئے نئے
دنیا نئی نئی سی دل و جاں نئے نئے
ساقی کی اک نگاہ نے بخشی حیاتِ نو
دل میں مچل گئے مِرے ارماں نئے نئے
بربادیوں کا اپنے نشیمن کی غم نہیں
تعمیر ہو رہے ہیں گلستاں نئے نئے
اس چشمِ نیم باز کی وہ کم نگاہیاں
دل میں اُتر گئے مِرے پیکاں نئے نئے
مسجد میں بھی فسانہ بُتوں کا جنابِ شیخ
شاید ہوئے ہیں آپ مسلماں نئے نئے
ممتاز اک چراغ سرِ رہ گزر سہی
ہونگے چراغ اس سے فروزاں نئے نئے
ممتاز میرزا
No comments:
Post a Comment