زندگی میں نہ کر تلاش مجھے
بت بنا کر مِرا تراش مجھے
بس یہی اِک مِری گزارش ہے
آ نہ پائے کوئی خراش مجھے
دل کے مندر میں پُوجنا مجھ کو
مت بنانا کبھی معاش مجھے
میں چمکتی ہوں تیری پلکوں پر
اب تو دے میری بود و باش مجھے
میں نے سورج بھی اوڑھ کر دیکھا
چاند کوئی اوڑھائے کاش مجھے
زندگی کو مِری سجا کر بھی
کر دیا اُس نے پاش پاش مجھے
کرچیاں کر کے مورتی رومی
ڈھونڈتا پھر ہے سنگ تراش مجھے
رومانہ رومی
No comments:
Post a Comment