متاع عشق نبی سے ہے یہ جہاں سرسبز

عارفانہ کلام نعتیہ کلام

متاعِ عشقِ نبیﷺسے ہے یہ جہاں سرسبز

درودِ پاکﷺ سے ہیں ساری بستیاں سرسبز

وہ ذکرﷺ ایسا بہاروں بھری مہک لایا

پڑھی جو نعت، ہوئے لامکاں، مکاں سرسبز

چراغِ نعت دروں دل کے جب جلایا گیا

یقیں مہکنے لگا، ہو گیا گماں سرسبز

سماعتوں کو ملی مدحتِ نبیﷺ سے بقا

وگرنہ صوت و صدا تھے مِرے کہاں سرسبز

چمک رہی ہے جو پیشانئ زمین و زمن

جبینِ وقت نے پایا ہے آستاں سرسبز

ہیں رنگ خاک میں سعدی سبھی انہی کے طفیل

انہیﷺ کے نقشِ کفِ پا سے آسماں سرسبز

سعدیہ صفدر سعدی