عارفانہ کلام حمد نعت منقبت سلام
سلام تجھ پہ مجھے تُو نے سرفراز کیا
نظر فروز کیا،۔ آشنائے راز کیا
سلام تجھ پہ کہ تُو نے ہی سازِ ہستی کو
بساطِ ارض و سماء میں نوا طراز کیا
سلام تجھ پہ کہ تیرے ہی طرف عالی نے
نگاہِ شوق و محبت میں امتیاز کیا
سلام تجھ پہ کہ دے کر عجم کو رنگِ خلوص
عرب کو تاج قیادت سے سرفراز کیا
سلام تجھ پہ کہ تکمیلِ دو جہاں کے لیے
حِرا کے غار کو شائستۂ نماز کیا
سلام تجھ پہ کہ مظلوم تھی جو صنفِ لطیف
اُسے نویدِ محبت سے سرفراز کیا
سلام تجھ پہ کہ تیری ہی ذاتِ اقدس کو
خدائے برتر و اعلیٰ نے عرش تاز کیا
سلام تجھ پہ کہ دے کر حقیقتوں کا سراغ
مِری نظر کو سرا پردۂ مجاز کیا
سلام تجھ پہ کہ میں نے بصد خلوص و نیاز
نظر کو صرف غبارِ رہِ حجاز کیا
سلام تجھ پہ کہ تیری ثمر نوازی نے
مجھے کشا کشِ دوراں سے بے نیاز کیا
عبدالکریم ثمر
No comments:
Post a Comment