خالق تری تعریف میں خود محو ثنا ہے

عارفانہ کلام حمد نعت منقبت

خالق تری تعریف میں خود محوِ ثنا ہے

الحمد سے والناس تلک تیری ادا ہے

خورشیدِ جہاں تاب تِرے حُسن کا پرتو

یہ مہرِ منور تِرا نقشِ کفِ پا ہے

منزل تِری آغاز وہیں سے ہوئی آقاﷺ

جبریلؑ سا نوری بھی جہاں جا کے رُکا ہے

یہ وقت کے دھارے بھی تو دربان ہیں تیرے

مجبور زمانہ تِرے قدموں میں پڑا ہے

ہر شخص نے اوڑھا ہے شریعت کا لبادہ

ہر شخص کی پوشاک پہ تصویرِ ریا ہے

جب حشر کا دن ہو، تِری قربت ہو میسر

ہم خاک نشینوں کی بس اتنی سی دُعا ہے

یہ خاص کرم ہے کہ تِری نعت لکھی ہے

ورنہ مِری اوقات، مِرا ظرف ہی کیا ہے

اعظم سا گُنہ گار تِرے در پہ سوالی

اے رحمتِ عالمؐ! تِری رحمت بھی جدا ہے

بلال اعظم