بڑھتی ہوئی نفرت کو محبت سے مٹا دے

 بڑھتی ہوئی نفرت کو محبت سے مٹا دے

دنیا کو بھی جینے کا یہ انداز سکھا دے

جاتے ہوئے لمحوں کا ہے بس اتنا تقاضا

بجھتے ہوئے شعلوں کو نہ پھر کوئی ہوا دے

کچھ ایسی خطائیں ہیں جو ہو جاتی ہیں سب سے

مالک پہ یہ چھوڑا ہے وہ جو چاہے سزا دے

فرزانوں سے پوچھا تھا کہ کس بات پہ گم ہیں

کہنے لگے ہنس کے کوئی دیوانہ بنا دے

بے باک سی فطرت پہ انہیں ناز بہت ہے

تہذیبی تقاضے بھی ہیں کچھ ان کو بتا دے

سوچا تھا کہ ان کو کوئی پیغام نہ دیں گے

موسم کا تقاضا ہے کوئی ان کو بلا دے

منزل پہ پہونچنا تو ہے بس کام تمہارا

رہبر کا ہے یہ کام کہ رستے کو بتا دے

گزرے ہوئے لمحوں کو اگر ڈر ہے تو اتنا

شمشاد انہیں ذہن سے اپنے نہ ہٹا دے

شمشاد حسین