پوچھتا آسمان ہے مجھ سے

 پوچھتا آسمان ہے مجھ سے

مختلف کیوں جہان ہے مجھ سے

جتنا تُو مہربان ہے اتنی

زندگی بد گُمان ہے مجھ سے

میں بڑا بیٹا ہوں تو لگتا ہے

میرا یہ خاندان ہے مجھ سے

دوسرا کوئی بھی نہیں شامل

بس مِری داستان ہے مجھ سے

وہ مِرے ساتھ کیوں نہیں چلتا

جس کی سب آن بان ہے مجھ سے

سوچتا ہوں کہ کیا بنے گا مِرا

اب تِرا امتحان ہے مجھ سے

گو کہ ہم عُمر تھے مگر کاتب

دل ابھی تک جوان ہے مجھ سے

سجاد کاتب