خواب میں کچھ بھی دیکھا جا سکتا ہے
خواب دیکھنا چاہیے
اور
خواب میں کچھ بھی دیکھا جا سکتا ہے
دیکھا جا سکتا ہے خود کو
من پسند لڑکی سے بغلگیر ہوتے
اور
اسے گردن سے نیچے تک
چومتے ہوئے
دیکھا جا سکتا ہے خود کو
ہزاروں لوگوں کے درمیان
کھیل کے آخری منٹ میں
ایک قیمتی گول کرتے ہوئے
دیکھا جا سکتا ہے خود کو
آگ میں گھرے ہوئے ہوٹل کی
آٹھویں منزل پر پھنسے ہوئے بچے کو
معجزانہ طور پر بچا کر لاتے ہوئے
دیکھا جا سکتا ہے خود کو
سینکڑوں مسافروں کے لیے
بحری قزاقوں سے لڑتے
اور
انہیں شکست دیتے ہوئے
دیکھا جا سکتا ہے خود کو
بُل فائٹر کے لباس میں
اور بے شمار تماشائیوں کے درمیان
ایک لڑکی کو
اپنے لیے دعا کرتے ہوئے
خواب دیکھنا چاہیے
اور
خواب میں کچھ بھی دیکھا جا سکتا ہے
مگر
بھول جانا چاہیے خواب کو
دفتر کے لیے نکلنے سے پہلے
یا
راستے میں کسی غیرآباد سڑک پر
پھینک دینا چاہیے
سگریٹ کے خالی پیکٹ کی طرح
ساحر شفیق
No comments:
Post a Comment