عارفانہ کلام نعتیہ کلام
خلق کے سرور، شافعِ محشر صلی اللہ علیہ و سلم
مرسلِ داورﷺ، خاص پیمبر صلی اللہ علیہ و سلم
نورِ مجسم، نیرِ اعظم، سرورِ عالمﷺ، مونسِ آدم
نوح کے ہمدم، خضر کے رہبر صلی اللہ علیہ و سلم
بحرِ سخاوت، کانِ مروت، آیۂ رحمت، شافعِ اُمتؐ
مالکِ جنتﷺ، قاسمِ کوثر صلی اللہ علیہ و سلم
رہبرِ موسیٰ، ہادئ عیسیٰ، تارکِ دنیا، مالکِ عقبیٰ
ہاتھ کا تکیہ، خاک کا بستر صلی اللہ علیہ و سلم
سردِ خراماں، چہرہ گلستاں، جبۂ تاباں، مہرِ درخشاں
سنبلِ پیچاں، زلفِ معنبر صلی اللہ علیہ و سلم
قبلۂ عالم، کعبۂ اعظم، سب سے مقدم، راز سے محرم
جانِ مجسم، روحِ مصور صلی اللہ علیہ و سلم
مہر سے مملو ریشہ ریشہ، نعت امیر اپنا ہے پیشہ
ورد ہمیشہ، دن بھر، شب بھر صلی اللہ علیہ و سلم
امیر مینائی
No comments:
Post a Comment