یہاں اب مسئلے حل ہو نہیں سکتے شکایت سے

 یہاں اب مسئلے حل ہو نہیں سکتے شکایت سے

امیدِ خیر رکھنا ہے حماقت اس حکومت سے

سبھی کو توڑنی ہوں گی عداوت کی یہ دیواریں

تمہیں جُڑنا پڑے گا ایک ہی ملی جماعت سے

وجود اپنا بچانا ہے تو اک پرچم تلے آؤ

وگرنہ اور دیکھے جاؤ گے تم اب حقارت سے

یہ کس نے کہہ دیا بس اہل ہیں دستار ہی والے

یہ ملت سرخرو ہو گی فقط مخلص قیادت سے

بڑی اب ذمہ داری آ پڑی ہے اہلِ دانش پر

نئی تنظیم کی تشکیل وہ کر لیں ذکاوت سے

سنو جب موت برحق ہے تواس کا خوف کیا معنی

کہیں عزت پہ بن آئے تو مر جانا شجاعت سے

تمہاری بزدلی سے بڑھ گئے ہیں حوصلے ان کے

نہ تھا مشکل تمہیں جینا یہاں پہلے شرافت سے

تمہاری گریہ و زاری نہ اب کچھ کام آئے گی

خدا کے واسطے ڈرنا نہیں دشمن کی ہیبت سے

بہت ہو منتشر یکسوئی کی صورت کرو پیدا

امیرِ کارواں اپنا بناؤ کوئی ملت سے

خود آپس میں نہیں مخلص تمہارے رہنما دینی

یہ امت پارہ پارہ ہو گئی ایسی قیادت سے

فراست جس میں ہو اب چاہیۓ ایسا کوئی قائد

جو واقف ہو زمانے بھر کی پیچیدہ سیاست سے

یہ لازم ہے کرو تشکیلِ نو ملی جماعت کی

وگرنہ غیر ممکن ہے نکلنا ایسی حالت سے

بُھلا کر نفرتوں کو آؤ پھر سے ایک ہو جاؤ

خسارہ ہی خسارہ ہے تمہارا اس عداوت سے

مِرا دل چاہتا ہے قوم کا نوحہ میں لکھ ڈالوں

مگر ارشاد! بچنا چاہتا ہوں بس طوالت سے

ارشاد دہلوی