یوں تو کہنے کو میں تری راہ کا پتھر نکلا

یوں تو کہنے کو میں تِری راہ کا پتھر نکلا

تُو نے ٹھوکر جو لگا دی تو میرا سر نکلا

لوگ تو جا کے سمندر کو جلا آئے ہیں

میں جسے پھونک کر آیا وہ میرا گھر نکلا

ایک وہ شخص جو پھولوں سے بھرے تھا دامن 

ہر کف گلِ میں چھپائے ہوئے خنجر نکلا

یوں تو الزام ہے طوفاں پہ ڈبو دینے کا 

تہہ میں دریا کی مگر ناؤ کا لنگر نکلا

گھر کے گھر خاک ہوئے جل کے ندی سوکھ گئی 

پھر بھی ان آنکھوں میں جھانکا تو سمندر نکلا

فرش تا عرش کوئی نام و نشاں مل نہ سکا 

میں جسے ڈھونڈ رہا تھا بیکلؔ مِرے اندر نکلا

بیکل اتساہی