عارفانہ کلام نعتیہ کلام
نغماتِ ازل بیدار ہوئے پھر بربطِ دل کے تاروں میں
تکبیر کی آوازیں گونجیں یثرب کے حسیں کہساروں میں
اے رشکِ مسیحا، فخرِ زماں، تو ہی ہے علاجِ دردِ نہاں
مجھ کو بھی پِلا داروئے شفا، میں بھی ہوں ترے بیماروں میں
اس شان ِ کرم کا کیا کہیئے، دنیا کو مسخّر جس نے کیا
یہ وصف کہاں شمشیروں میں، یہ بات کہاں تلواروں میں
مستانہ ہواؤں کے جھونکے، نذرانہ عقیدت کا لائے
شبنم کے گہر تقسیم ہوئے، کچھ پھولوں میں کچھ خاروں میں
پھولوں کی زباں پر ذکر تِرا، غنچوں کے لبوں پر مدح تِری
اے حسنِ ازل کے شیدائی، چرچا ہے تِرا مہ پاروں میں
مومن کی نگاہوں میں فطرت، کہسارِ عرب ہے رشکِ جناں
پھولوں کا تبسم رقصاں ہے، فردوس بداماں خاروں میں
فطرت بھٹکلی
محمد حسین فطرت
No comments:
Post a Comment