چڑیاں
کچھ چڑیاں گِدھوں سے محبت کرتی ہیں
گِدھ جو آسمانوں میں اڑتے کم ہیں
منڈیروں پر بیٹھتے زیادہ ہیں
کبھی کبھی وہ چڑیوں سے ملنے نیچے آنے کے لیے زقند بھرتے ہیں
یوں جیسے کسی نظم کی اچانک آمد ہو جائے
یا چھن سے کسی بازو کی چوڑیاں کھنک اٹھیں
سب کچھ بھلا لگنے لگتا ہے
آنگن سے امبر کو تکتی چڑیاں
منتظر رہتی ہیں کہ گِدھ آئیں
آ کر ان کا گوشت کھائیں
پر نوچیں، ہڈیاں چچوڑیں
ایک دوسرے کا جزوِ بدن بن جائیں
پھر گِدھ اڑ جاتے ہیں نئی منڈیریں ڈھونڈنے
پیار کے نام کا دانا دُنکا چننے والی چڑیاں
پھر سے اپنے ریزے جمع کرنے لگ جاتی ہیں
نیلم احمد بشیر
No comments:
Post a Comment