اس توقع پہ کھلا رکھنا گریباں اپنا

 اس توقع پہ کُھلا رکھنا گریباں اپنا

جانے کب آن ملے جانِ بہاراں اپنا

لمحے لمحے کی رفاقت تھی کبھی وجہِ نشاط

موسمِ ہجر ہوا اب سر و ساماں اپنا

نِت نئے خواب دِکھاتا ہے اجالوں کے لیے

وہ کہ ہے دشمنِ جاں، دشمنِ ایماں اپنا

نکہتِ گُل ہی نہیں، خاک بھی ہے ہم کو عزیز

اپنا صحرا ہے، چمن اپنا، خیاباں اپنا

دیکھ لیتی ہے جہاں عزم و یقیں کے پیکر

رخ بدلتی ہے وہاں گردشِ دوراں اپنا

یہ تو مانا کہ ہوئی عشق میں رسوائی بہت

ہو گیا نام غزل میں تو نمایاں اپنا

اس سے بچھڑے ہیں تو محسوس ہوا ہے ناصر

حال اِتنا تو نہ تھا پہلے پریشاں اپنا

ناصر زیدی