یوں پابندِ سلاسل ہو کر کون پھرے بازاروں میں
خود ہی قید نہ ہو جائیں کیوں اپنی ہی دیواروں میں
رات کے لمحوں کی سنگینی دل کو ڈستی رہتی ہے
جسم سُلگتا رہتا ہے تنہائی کے انگاروں میں
روشنیوں کے شہر اندھیروں کے جادو میں ڈوب گئے
بجھنے لگی ہو نور کی مشعل جیسے چاند ستاروں میں
درد کے تپتے صحرا میں اک آبلہ پا سر گرداں ہے
تم کو کیا تم جشن مناؤ خوشیوں کے گہواروں میں
میں کوئی سقراط نہ تھا جو زہر کا پیالہ پی جاتا
میں خود کیسے ڈوب سکوں گا اپنے لہو کی دھاروں میں
شہر کی راہیں رقص کناں ہیں رنگ فضا میں بکھرا ہے
کتنے چہرے سجے ہوئے ہیں ان چمکیلی کاروں میں
اسرار زیدی
No comments:
Post a Comment