اس عشق جنوں خیز میں کیا کیا نہیں ہوتا

 اس عشق جنوں خیز میں کیا کیا نہیں ہوتا

دیوانہ ہے جو قیس سے لیلیٰ نہیں ہوتا

کچھ حشر لحد پر ابھی برپا نہیں ہوتا

آئے ہو تو ٹھہرو کوئی زندہ نہیں ہوتا

کیوں کر یہ کہوں حسن کا نشہ نہیں ہوتا

ہوتا تو بہت ہے، مگر اتنا نہیں ہوتا

کچھ کہئے تو شرما کے جھکا لیتے ہیں گردن

بھولے سے بھی اب وعدۂ فردا نہیں ہوتا

ملتے ہیں وہ دل سرخ ہوئی جاتی ہے چٹکی

نازک ہیں بہت خون تمنا نہیں ہوتا

دیتی ہے مزا مے کا ہمیں تلخئ‌ توبہ

جب ہاتھ میں پیمانۂ صہبا نہیں ہوتا

وہ حشر کے دن کشتے کو ٹھکرا چکے سو بار

کچھ جان سی پڑ جاتی ہے زندہ نہیں ہوتا

بولی یہ تمنا جو رکے وہ در دل پر

گھر آپ کا ہے آپ سے پردا نہیں ہوتا

تیروں کو جگہ دیتے ہیں جو سینے میں اپنے

ان لوگوں کے اے جان کلیجہ نہیں ہوتا

صحرا سے قدم گھر کی طرف خاک اٹھاؤں

کانٹے سے جدا پاؤں کا چھالا نہیں ہوتا

بیٹھے نظر آتے ہیں وہی تیری گلی میں

جن کا کہیں دنیا میں ٹھکانا نہیں ہوتا

فرقت میں ہے کیوں نزع کی تکلیف گوارا

مر جائیں ریاض آپ سے اتنا نہیں ہوتا

ریاض خیر آبادی