کن کی تجلیات محمد کی ذات ہے

 عارفانہ کلام حمد نعت مقبت

کُن کی تجلیات محمدﷺ کی ذات ہے

نُورِ الہیّات محمدﷺ کی ذات ہے

عکسِ جمالیات محمدﷺ کی ذات ہے

آئینہ دارِ ذات محمدﷺ کی ذات ہے

بعد از خدا کی ذات محمدﷺ کی ذات ہے

اللہ کی صفات محمدﷺ کی ذات ہے

مقصودِ کائنات محمدﷺ کی ذات ہے

تکمیلِ شش جہات محمدﷺ کی ذات ہے

سر تا پا التفات محمدﷺ کی ذات ہے

رحمت کی کلیات محمدﷺ کی ذات ہے

تاریکئ لحد ہو کہ ہنگامِ حشر ہو

صورت گرِ نجات محمدﷺ کی ذات ہے

کہتے ہیں جس کو باعثِ تخلیقِ کائنات

وہ ذات ایک ذات محمدﷺ کی ذات ہے

جن کا نہیں جواب نہ جن کی کہیں مثال

وہ بے مثال ذات محمدﷺ کی ذات ہے

کرتے ہیں آپﷺ بات خدا کی زبان میں

قرآں کی بات بات محمدﷺ کی ذات ہے

آتا ہے جس کے واسطے رب کی جناب سے

نذرانۂ صلٰوۃ محمدﷺ کی ذات ہے

تُو بھی ہلال مانگ لے جو مانگتا ہے آج

مائل بہ التفات محمدﷺ کی ذات ہے

ہلال جعفری