چھپ کے دنیا سے سواد دل خاموش میں آ

چھپ کے دنیا سے سوادِ دلِ خاموش میں آ

آ یہاں تُو مِری ترسی ہوئی آغوش میں آ

اور دنیا میں تِرا کوئی ٹھکانہ ہی نہیں

اے مِرے دل کی تمنا لبِ خاموش میں آ

مئے رنگیں! پسِ مِینا سے اشارے کب تک

ایک دن ساغرِ رِندانِ بلا نوش میں آ

عشق کرتا ہے تو پھر عشق کی توہین نہ کر

یا تو بے ہوش نہ ہو، ہو تو، نہ پھر ہوش میں آ

تُو بدل دے نہ کہیں جوہرِ اںساں کا بھی رنگ

اے زمانے کے لہو! دیکھ نہ یوں جوش میں آ

دیکھ کیا دام لگاتی ہے نگاہِ ملاؔ

کبھی اے غنچۂ تر، دستِ گل افروش میں آ

آنند نرائن ملا