صحن‌ چمن ہے گوشۂ زنداں ترے بغیر

 صحن‌ چمن ہے گوشۂ زنداں تِرے بغیر

معمورۂ حیات ہے ویراں تِرے بغیر

چھپ چھپ کے جس کو دیکھنے آتا تھا ماہتاب

ظلمت کدہ ہے اب وہ شبستاں تِرے بغیر

جلتا ہے چارہ ساز کی نادانیوں پہ جی

میں اور میرے درد کا درماں تِرے بغیر

سوتی ہیں اس میں کتنی امیدیں فنا کی نیند

سینہ ہے ایک شہر خموشاں تِرے بغیر

میری ہنسی کہ تھی تِرا سرمایۂ نشاط

آ دیکھ اب ہے خندۂ گریاں تِرے بغیر

مہتاب کے ہجوم میں گم ہو گئی تھی رات

پھر قہر بن گیا غم دوراں تِرے بغیر

جلتا ہے تیز تیز تڑپتا ہے پے بہ پے

دل ہے کہ ایک شعلۂ لرزاں تِرے بغیر

میں ہیچ ہوں مگر مجھے اتنا سبک نہ کر

میں اور نشاط زیست کا ارماں تِرے بغیر

جس زندگی کو تُو نے بنایا تھا زندگی

وہ زندگی ہے خواب پریشاں تِرے بغیر

عندلیب شادانی