ویراں ہے تمناؤں کا منظر ترے ہوتے

ویراں ہے تمناؤں کا منظر تِرے ہوتے

تاریک ہے ارمانوں کا بستر ترے ہوتے

اک چشمِ کرم شہرِ غریباں پہ اِدھر بھی

پیاسا ہے نگر ایک سمندر ترے ہوتے

کچھ تجھ کو خبر ہے مِرے دمساز مسیحا

پھرتا ہوں رہِ زیست میں در در ترے ہوتے

کیا تجھ کو گوارا ہے تِرا بندۂ مجبور

اغیار کی چوکھٹ پہ رکھے سر ترے ہوتے

اے گردشِ مینائے شب و روز بتا کچھ

کیوں شہر میں ہیں اتنے گداگر ترے ہوتے

اک یہ بھی ہے انداز تِرے حُسنِ کرم کا

ہوں رہ کے وطن میں بھی مسافر ترے ہوتے

ہے کُنجِ قفس میں یہ تِرا حال غمِ دل

کیا حشر اٹھاتا جو کبھی پر ترے ہوتے

قاتل بھی ہے تُو اور مسیحا بھی مِرا تُو

کیا رنگ کروں دل کا فسوں گر ترے ہوتے

اک مرحلۂ مرگ ابھی اور ہے باقی

یہ کام بھی ہو جائے ستمگر ترے ہوتے

اے شیخ تِرے فکر کی یہ شعلہ بیانی

مانند گُہر ہائے سخنور ترے ہوتے

نور احمد شیخ