چمن پہ دام پہ درویش مسکراتا ہے

 چمن پہ دام پہ درویش مسکراتا ہے

ہر اک مقام پہ درویش مسکراتا ہے

صراحی بزم میں جب قہقہے اگلتی ہے

سکوت جام پہ درویش مسکراتا ہے

ہزار حشر اٹھا اے تغیر دنیا

تیرے خرام پہ درویش مسکراتا ہے

شفق میں خون شہیداں کا رنگ شامل ہے

فروغ شام پہ درویش مسکراتا ہے

کبھی خدا سے شکایت کبھی گلہ خود سے

مذاق عام پہ درویش مسکراتا ہے

ہوس مشیر ہو جس بادشاہ کی ساغر

تو اس غلام پہ درویش مسکراتا ہے

ساغر صدیقی​