یادوں کا شہر دل میں چراغاں نہیں رہا

 یادوں کا شہرِ دل میں چراغاں نہیں رہا

کیا کوئی غم ہی شعلہ بداماں نہیں رہا

اب اعترافِ عہدِ وفور کر رہے ہیں وہ

جب اعتبارِ عمرِ گریزاں نہیں رہا

نکلے کچھ اور آبلہ پائی کی اب سبیل

صحرا میں کوئی خارِ مغیلاں نہیں رہا       

بخیہ گرئ دل کے تصوّر میں گم ہوئے

گویا خیالِ جنبشِ مژگاں نہیں رہا

یہ سوچ کر کہ خوگرِ غم ہو نہ جاؤں میں

وہ سرگراں ہوا ستم ارزاں نہیں رہا

آزارِ ہجر اپنی جگہ مستقل، مگر

دل مجھ سے تیرے قرب کا خواہاں نہیں رہا

یادِ خدا ہی کعبۂ دل میں بسائیے

اب ایک بت بھی دشمنِ ایماں نہیں رہا

امکانِ وصلِ یار تو اخگر کبھی نہ تھا

آزارِ ہجرِ یار کا ارماں نہیں رہا

حنیف اخگر