جھوٹ کے ہاتھ بہت لمبے ہیں

 نئی کہانی 

یہ ہی بچپن سے مِری ماں مجھے سمجھاتی تھیں

جھوٹ کے پاؤں نہیں ہوتے ہیں

روز سکول میں خوشخط یہی استانی بھی لکھواتی تھیں

جیت سچ کی ہی ہوا کرتی ہے

دادا ابا کے سنائے ہوئے ہر قصے میں

سرخرو سچ ہی ہوا کرتا تھا

نانی اماں سے کہانی جو سنا کرتے تھے ہم رات گئے

نیند میں ڈوبی سماعت میں اتر آتا تھا

ہر کہانی کا وہی ایک سا انجام ہوا کرتا تھا

اور سچ جیت گیا

کتنے نادان تھے بھولے تھے وہ لوگ

کون سی دنیا میں گُم رہتے تھے

اپنی نادانی سے ہم بچوں کو گمراہ کیا کرتے تھے

میں نے سوچا ہے کہ بچوں کے لیے ایک کہانی لکھوں

میں لکھوں گی مِرے پیارے بچو

جھوٹ کے پاؤں نہیں ہوتے ہیں

اس کو چلنے کی ضرورت ہی نہیں

جھوٹ کے ہاتھ بہت لمبے ہیں

عذرا نقوی