نبی کا جشن مناتے ہیں جو عقیدت سے

عارفانہ کلام نعتیہ کلام

نبیؐ کا جشن مناتے ہیں جو عقیدت سے 

خزانہ ملتا ہے ان کو خدا کی رحمت سے 

جنہیں عزیز ہے میلادِ مصطفیٰؐ کی خوشی 

انہی کے کام تو بن جاتے ہیں سہولت سے 

درود و نعت وظیفہ ہے روز و شب جن کا 

نوازتا ہے خدا ان کو خوب برکت سے 

عیاں ہے بالیقیں فرمانِ کبریا سے یہی 

خدا کی ہو گی اطاعت نبیؐ کی طاعت سے 

ذلیل و خوار ہوئے جا رہے ہیں دنیا میں 

کہ جب سے دور ہوئے ہیں نبیؐ کی سنت سے 

نبیﷺ کے نام کا میں نے خیال ہی باندھا 

رہائی مل گئی فوراً تمام کلفت سے 

بِلا طلب ہی دیا شاہِ دیںؐ نے منگتوں کو 

گدا بھی داتا بنے آپؐ کی سخاوت سے 

ملی نجات کی کشتی بھی اور تارے بھی 

لگائی لَو جو صحابہ سے اور عترت سے 

سند ملے گی انہیں روزِ حشر بخشش کی 

شغف ہے جن کو مشاہد نبیؐ کی مدحت سے

مشاہد رضوی