مرے آنگن میں بکھرے زرد پتے مجھے ہمراز لگتے ہیں

 ری انکرنیشن Reincarnation

مِرے آنگن میں بکھرے زرد پتے

مجھے ہمراز لگتے ہیں

یہ جب ہلکی ہوا کی سرسراہٹ سے لرزتے ہیں

تو یوں لگتا ہے جیسے

ان پہ کوئی بھید سا کھلنے لگا ہے

جیسے ان کو باور ہو گیا ہے

کہ خود شاخوں نے بے پروائی سے دامن چُھڑایا ہے

زمیں نے بھی نگاہیں پھیر لی ہیں

انہیں معلوم ہے شاید

زمیں پیروں تلے ہی جب نہ ہو تو

جتنا مرضی سر پٹخ لیں 

ٹہنیوں کو تھام لیں

بے فائدہ ہے

اب انہیں بے آسرا رہنا پڑے گا

کبھی پیروں میں آ کر چُرمرانا 

ہوا کے دوش پر اُڑتے

بکھرتے ہی چلے جانا پڑے گا

وجود اپنا کسی گمنام گوشے میں چھپا کر

رائیگانی کی اذیت ان کو سہتے ہی چلے جانا پڑے گا

خیال آتا ہے

کتنی بے نشاں، بے مول بے وقعت سی ان کی زندگی ہے

مگر یہ بے نشانی جن خلاؤں کو جنم دیتی ہے

انہیں بھرنے کو جیون کونپلوں سے آخر اک دن پھوٹتا ہے

یہی اک سوچ مجھ کو

اپنے آنگن میں بکھرتے چُرمراتے زدر پتوں سے

بہت مانوس رکھتی ہے

بہت نزدیک رکھتی ہے

میمونہ عباس خان