اول و آخر رحمت عالم صلی اللہ علیہ وسلم

 عارفانہ کلام حمد نعت منقبت

اول و آخر، رحمتِ عالم صلی اللہ علیہ وسلم

حُسنِ سراپا، عشقِ مجسّم صلی اللہ علیہ وسلم

مظہرِ نُورِ ذاتِ الٰہی، سرِ علوم و رازِ خُدائی

ہادیٔ بر حق، رہبرِ اعظم، صلی اللہ علیہ وسلم

رُوئے منور، سیرتِ اطہر، شافعِ محشر، ساقئ کوثر

تم ہو جمالِ روحِ مکرّم، صلی اللہ علیہ وسلم

خلق تمہارا کامل و اکمل، ذات تمہاری اشرف و افضل

تم سے مفخّر اُمّتِ آدم، صلی اللہ علیہ وسلم

روحِ اخوّت، وجہِ محبت، شمعِ ہدایت، شانِ نبوتؐ

ارفع و افضل، سرورِ عالمؐ، صلی اللہ علیہ وسلم

مہرِ گدایاں، لطفِ یتیماں، محسنِ انساں، عاشقِ یزداں

شانِ خودی و فخرِ دو عالم، صلی اللہ علیہ وسلم

وارثِ ایماں، چشمۂ عرفاں، مہرِ درخشاں، صاحبِ قرآں

شانِ یقیں، ایقانِ مُسلم، صلی اللہ علیہ وسلم

ماہِ فروزاں، نیرِّ تاباں، نعمتِ یزداں، دلبرِ رحماں

تم سے مشرّف عرشِ معظم صلی اللہ علیہ وسلم

شوق کا عالم اللہ اللہ، عشقِ محمدﷺ بلّے بلّے

نورِ نبیؐ ہے وجہِ دو عالم صلی اللہ علیہ وسلم

سید فخرالدین بلے