مجھے جس دم خیال نرگس مستانہ آتا ہے

مجھے جس دم خیالِ نرگسِ مستانہ آتا ہے
بڑی مشکل سے قابو میں دلِ دیوانہ آتا ہے
مزہ دیتا ہے جب بادل سُوئے مے خانہ آتا ہے
صراحی جھومتی ہے، وجد میں پیمانہ آتا ہے
بہارِ جام و مِینا بس گئی ہے ایسی آنکھوں میں
جدھر جاؤں جدھر دیکھوں نظر مے خانہ آتا ہے
فِراقِ یار سے بڑھ کر وِصالِ یار آفت ہے
قریبِ شمع، مرنے کے لیے پروانہ آتا ہے
گھٹا کو دیکھ کر رِندوں کے دل لہرائے جاتے ہیں
گھٹا آتی ہے ساقی! یا کوئی مے خانہ آتا ہے
تِری محفل کو میں اے شمع رُو مقتل سمجھتا ہوں
پلٹ کر پھر نہیں جاتا ہے جو پروانہ آتا ہے
مِرے جانے پہ اٹھ جاتی ہے فوراً آنکھ ساقی کی
وہ مے کش ہوں کہ استقبال کو مے خانہ آتا ہے
جنُوں انگیز کیا آب و ہوا ہے کُوئے جاناں کی
کہ جاتا ہے جو عاقل، ہو کے وہ دیوانہ آتا ہے
مِری توبہ ہے ایسی جس کو خود توبہ کی حاجت ہے
بدل جاتی ہے نیت یاد جب مے خانہ آتا ہے
صدائے قلقلِ مِینا جتاتی ہے یہ رِندوں کو
کہ ہوش اپنے سنبھالو، دَور میں پیمانہ آتا ہے
مچلنا رُوٹھنا، بے چین دِل کا اِک تماشا ہے
یہ وہ عاشق ہے جس کو نازِ معشوقانہ آتا ہے
بہار آنے پہ سب لیتے ہیں رستہ باغ و صحرا کا
جو کچھ بھی ہوش رکھتا ہے سُوئے مے خآنہ آتا ہے
کوئی ساغر بکف ہے، کوئی محوِ چشمِ ساقی ہے
ہمارے ہاتھ دیکھیں کون سا پیمانہ آتا ہے
تجھے تو شوقِ مے نوشی ہے مجھ کو رشک اس کا ہے
تِرا منہ چومنے کو دَم بدَم پیمانہ آتا ہے
مزے لیتے ہوئے جاتے ہیں تیرے مست کعبے کو
ٹھہر جاتے ہیں رستے میں جہاں مے خانہ آتا ہے
مشیت جب یونہی ٹھہری تو میری کیا خطا ناصح
حرم کو ڈھونڈتا ہوں، سامنے بُت خانہ آتا ہے
حواس آئے ہوئے پھر کھو دیے لیلیٰ نے مجنوں کے
‘یہ کہنا تازیانہ تھا، ’مِرا دیوانہ آتا ہے
رسائی کی ہوس تجھ کو ہے اے دِل سوچ لے اتنا
کہ زلفِ یار تک صد چاک ہو کر شانہ آتا ہے
جلیلؔ اس سے پتہ چلتا ہے دِل کی بے قراری کا
کہ لب پر شعر جو آتا ہے، بے تابانہ آتا ہے

جلیل مانکپوری