دل تجھے دیکھ کے کچھ دیر تو یوں رہتا ہے

 دل تجھے دیکھ کے کچھ دیر تو یوں رہتا ہے

جیسے بے گھر کو کسی گھر میں سکوں رہتا ہے

تجھ سے بچھڑا ہوں تو مُرجھایا ہوا رہتا ہوں

غم زیادہ ہو تو پرچم بھی نگوں رہتا ہے

دوسری بار محبت ہے،۔ وہی حالت ہے

مل کے آؤں بھی تو ملنے کا جنوں رہتا ہے

تجھ سے ملتا ہوں، تو پہچان لیا جاتا ہوں

مجھ پہ اک عرصہ تلک تیرا فسوں رہتا ہے

درد کو میں نے بہت لاڈ سے پالا ہے کمال

جب تلک عابدہ پرویں نہ سنوں، رہتا ہے

مصطفیٰ کمال