یوں توڑ نہ مدت کی شناسائی ادھر آ

 یوں توڑ نہ مدت کی شناسائی، ادھر آ

آ جا، مِری روٹھی ہوئی تنہائی، ادھر آ

مجھ کو بھی یہ لمحوں کا سفر چاٹ رہا ہے

مل بانٹ کے رو لیں مِرے بھائی، ادھر آ

اے سیلِ روان ابدی، زندگی نامی

میں کون سا پابند ہوں، ہرجائی، ادھر آ

اس نگہت و رعنائی سے کھائے ہیں کئی زخم

اے تُو کہ نہیں نکہت و رعنائی، ادھر آ

اعصاب کھنچے جاتے ہیں اب شام و سحر میں

ہونے ہی کو ہے معرکہ آرائی، ادھر آ

سنتا ہوں کہ تجھ کو بھی زمانے سے گلہ ہے

مجھ کو بھی یہ دنیا نہیں راس آئی، ادھر آ

میں راہ نماؤں میں نہیں، مان مِری بات

میں بھی ہوں اسی دشت کا سودائی، ادھر آ

مظفر حنفی