آنکھوں آنکھوں میں اشارات الف سے ی تک

 آنکھوں آنکھوں میں اشارات الف سے ی تک

سہمے سہمے سے ہیں جذبات الف سے ی تک

شب کے سینے میں لرزتی ہیں کراہیں پل پل

دن کے ہونٹوں پہ ہیں نغمات الف سے ی تک

آہٹیں، دھڑکنیں، بے چینیاں، آنکھیں، نیندیں

کیسے گزری ہے مِری رات الف سے ی تک

آج سورج کے دریچوں سے نکل آئے گا چاند

ہے عجب حسنِ ملاقات الف سے ی تک

نام، تعلیم، پتہ،عمر، مشاغل، پیشہ

کیسے کیسے تھے سوالات الف سے ی تک

اجنبی لفظ، تھکا لہجہ، شکستہ مفہوم

کون سمجھے گا مِری بات الف سے ی تک

جاوید اکرم