سادھو سب سچ جان چکا تھا

 سادھو

سادھو پربت پار کر کے چوٹی پر ہی پہنچا تھا کہ

دور سے مندر کی گھنٹی کو سُن کر وہ حیران ہوا اور

پاس گیا تو اُس نے دیکھا 

مندر کے دالان میں بیٹھی رادھا پُوجا کر رہی ہے

اس منظر کو دیکھ کے سادھو خاموشی سے بیٹھ گیا 

چُپ سادھے وہ دیکھ رہا تھا

رادھا کیسے خاموشی کی سادھنا میں گا رہی ہے

پنچھیوں کے جھمگٹ میں اس موہنی نے 

راگ میگھ کو چھیڑا تو آسمان سے پانی کی چند بُوندیں ٹپکیں

سادھو نے ماتھا ٹیکا اور غار کی سمت نکل پڑا

رستے میں آواز سُنی تو سادھو پھر حیران ہوا

دور کہیں سے چٹانوں میں گونجتی اک آواز آئی

سادھو نے جب کان دھرے تو اُس نے جانا

کہنے والا کہہ رہا تھا؛

مُحَمَّدًا رَّسُولُ اللّٰه

وہ پاس گیا تو اس نے دیکھا 

سوکھی ٹانگوں والا ایک خوبرو سا چرواہا 

اپنا ریوڑ چھوڑ چھاڑ کر چوٹی پر چڑھا ہوا ہے

کچھ اونچا اونچا بول رہا ہے

بڑی ہی دلنشیں صدا ہے جو پربتوں میں گونج رہی

آسماں بھی لرز رہا ہے اور زمیں بھی جُھوم رہی ہے

سادھو یہ سب دیکھ کر بھی خاموشی سے کھڑا ہوا تھا

سادھو نے پھر نظر اُٹھا کر آسمان کو تکا 

اور چُپ توڑ کر بول پڑا؛

انسانوں کی بستی سے میں دور چلا تھا

 کہ میں تجھ کو ڈھونڈ سکوں

تُو تو ہر ذرّے میں ہے یہ راز مجھ پہ اب کھلا ہے

پر جو تیرا نام لیے نگر نگر میں پِھرتے ہیں وہ انساں ہیں؟

اگر وہ آدم واسی ہیں تو مجھ کو یہ بتلا دے تُو

میں ان کی بستی چھوڑ چھاڑ کر کتنے جنگل پار کئے

ان پربتوں میں آ بسا ہوں

یاں تو کوئی مجلس ہے نا جلسہ ہے

پر تیری پُوجا ہو رہی ہے

وہ اک ہستی جو حِرا سے اُٹھ کر 

تیرا نعرہ مارتی پورے عرب پہ چھا گئی تھی

آج اس پربت پر بھی

تورے نام کے سنگ، اس کا نام گونج رہا ہے

میں بھی آدم واسی ہوں اور ان کی ہی بستی سے ہوں

انسانوں کی بستی میں اب بہت سے نعرے گونج پڑے ہیں

اور ان نعروں کی گونج میں

یہ صدائیں مدھم ہو چکی ہیں

وہ یہ نام جانتا تھا

سو اس کو پہچان چکا تھا

سادھو سب سچ جان چُکا تھا

احسن اقبال احمد